بەکارهێنانی wget بۆ داگرتنی پەڕگە لە لینوکسدا

بەکارهێنانی wget بۆ داگرتنی پەڕگە لە لینوکسدا

توڵی wget چییە؟

توڵێکی خۆڕایی و سەرچاوە-کراوەیە کە بۆ داگرتنی پەڕگە (فایل) لە وێبەوە دیزاینکراوە. ئەم توڵە پاڵپشتی لە HTTP و HTTPS و پرۆتۆکۆلەکانی FTP دەکات. یەک لە باشترین تایبەتمەندییەکانی بریتییە لە بەردەوامیدانەوە بە پرۆسەیەکی وەستاو. بە واتایەکی تر، کاتێک پەڕگەیەک دادەگریت، لەوەیە ئینتەرنێتەکەت بپچڕێت یان لەوەیە ڕاژەکارەکە (سێرڤەر) پەیوەندی بپچڕێت و ئەوەندەی کە داگیراوە، سفر ببێتەوە. ئەم توڵە لەم بابەتە زۆر بە کەڵکە بە جۆرێک ئەوەندەی کە داگیراوە نافەوتێت و لە کوێ پسابێت لەوێ گرێی دەداتەوە.

دامەزراندن

لەسەر زۆرینەوەی دابەشکراوەکانی وەکو زۆرین، ئوبونتو، دێبیان، ئلێمێنتری، هتد. پێشوەختە دامەزراوە. خۆ ئەگەر دابەشکراوەیەکی تۆ تێدا نەبوو، بەم فەرمانەی خوارەوە دایبەزێنە.

sudo apt-get install wget (دێبیان و ئوبونتو) 
sudo yum install wget (CentOS/RHEL) 
sudo pacman -S wget(Arch Linux)

با ناوی خوای لێبێنین…

سینتاکسی سەرەکی بەکارهێنانی ئەم فەرمانە هێڵییە بەم شێوەیەی خوارەوەیە:
ناوی توڵەکە (wget) + بژاردەکان + بەستەر (لینک – URL)

بۆ نموونە:

wget http://linux.krd/file.zip

١. توڵەکە خۆی ئەو ناوە وەردەگرێت کە لە بەستەرەکەدایە، بەڵام دەتوانیت ناوی ئەو پەڕگەیەی دایدەگریت بگۆڕیت بۆ ناوێکی دیاریکراو بە بەکارهێنانی بژاردەی -O

wget -O newfilename.zip http://example.com/file.zip

٢. سنووردارکردنی خێرایی داگرتن بژاردەیەکی ترە کە دەکرێت تۆ نەتەوێت توڵەکە هەموو باندویدسی ئینتەرەنێتەکەت بەکاربهێنێت ئەمەش بە بەکارهێنانی بژاردەی –limit-rate

wget –limit-rate=400k http://example.com/file.zip

ئەم فەرمانەی سەرەوە پەڕگەکە بەخێرایی ٤٠٠ کیلۆبایت لە چرکەیەکدا دادەگرێت.

٣. ئەگەر ویستت پەڕگەیەک دابگریت و پڕۆسەکە پچڕا، دەتوانی بە بژاردەی -c دوبارە بەردەوامی بدەیەوە بە پڕۆسەکە، بڕوانە ئەم فەرمانەی خوارەوە:

wget -c http://example.com/file.zip

٤. داگرتنی کۆمەڵێک پەڕگە بەیەکەوە یەکێکی تر لە تایبەتمەندییە نازدارەکانی ئەم توڵە. سەرەتا تۆ پەڕگەیەک دروست بکە و بەستەری ئەو پەڕگانەی بخە ناو کە دەتەوێت دایانبگریت، پاشان ئەم فەرمانەی خوارەوە بدە:

wget -i list_of_files.txt

٥. ئەگەر هاتوو ئینتەرنێتەکەت خراپ بوو یان بە هەر هۆکارێکی تر پەیوەندی بپچڕێت و پەیوەندییەکە جێگیر نەبێت، دەتوانی ئەم فەرمانە بەکاربهێنیت. لەم فەرمانەدا توڵەکە ٥ جار هەوڵدەدات پەڕگەکە دابگرێت پێش ئەوەی کۆڵبدات!

wget --tries=5 http://example.com/file.zip

٦. هەندێک جار ئەو شوێنەی کە پەڕگەکەتی لێدادەگریت، بە ئیمێڵ و تێپەڕەوشە پارێزراوە، واتا پێویستە تۆ بچیتەژورەوە ئینجا پەڕگەکە دادەگیرێت. ئەمەش بە بژاردەکانی –user و — password ئەنجام دەدرێت. بڕوانە ئەم فەرمانەی خوارەوە:

wget --user=username --password=password http://example.com/protectedfile.zip

هەڵبەتە توڵەکە کاری زیاتری پێدەکرێت لێ ئەمانەی سەرەوە گرنگترینەکان بوون. لەم بەستەرەش دەتوانن زانیاری زیاتر دەستبخەن. هیوادارم سوودێکی هەبێت.


سەرنجەکان

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *